شيواحد

سوري

الكازية

خواطر مستقاة من دور الكازية
(عجبتني هي مستقاة)
ما علينا
أول شي على دور الكازية طائفتي بنزيني ويمكن بوقت تاني مازوتي أو كهربائي أو خبزي يعني الهم واحد يا عالم ياناس يا زبالة
تاني شي طلع معي في خضم النطرة عالدور كوكبة من الأقوال المأثورة وهي:
1- واستعينو على قضاء حوائجكم بالدخان ويفضل حمرا طويلة
2-إني أرى في البنزين حياة
3-السيارة بلا بنزين جدول لاماء فيه
4-لافرق بين مرسيدس وكيا ريو إلا بالبنزين
تالت شي اللي بيحاول يتحيون بالدور بيلتعن سماه نظامي لان الناس له بالمرصادي
رابع شي رغم كل شي صاير فينا لسه الناس عندا خلق تضحك فعلا كم انت كبير أيها السوري
خامس شي لافرحة في العالم تعادل فرحة إنك توصل عالطرنبة ويجي العامل يشكو بقفا السيارة وأووووه …. ييييييه
وأخيرا للي صبر وقرا هالتفاهات للأخير شكرا

أضف تعليق »

الفقير أحمد

الفقير أحمد15 كانون الثاني 2013

بالزمنات لما كنت صف سادس أخدت 50% بالرياضيات هي كانت أول علامة بتنحسب كنسبة مئوية مو من 10….
يومها أكلت قتلة من إمي حشك و لبك, و من وقتها الرياضيات عدوي الأول…

كنت من هبلي أفتح على أسماء المؤلفين و حط الحق عليهن لأني ما بفهم بالرياضيات….
و الأستاذ القدير أحمد الفقير كان إسمو دائماً موجود بين أسماء المؤلفين…..
الأستاذ أحمد اليوم معتقلٌ…ليش العقول عم تعتقل الله أعلم!

حدا يفهم السجّانين إنو:
الهندسة الفراغية تختلف عن القنابل الفراغية….
و إنو التحليلية تختلف عن التحليل السياسي…
و المثلثات تختلف عم مربعات خالد العبود..

أما الجبر و المنطق, فكل شي عم بصير بالجبر, و ولا شي عم يصير بالمنطق…

الحرية لكتاب الرياضيات….

أضف تعليق »

إصابة 3 بطاريق

بصراحة بعدما شبعت حزن ع الناس المشردة واللي عم تموت من البرد ودعيت من كل قلبي … سمعت أصوات أعلى … أصوات إلي سنتين مو سمعان متلا … شباب وصبايا وأطفال وكبار معبيين الشوارع وعم يلعبو وضحكاتون عم ترن بقلب غرفتي … صفنت فيا … أنو يعني ما بصير نفرح بربع ليرة ؟ مالازم يطلع صوتنا إلا بالمآسي ؟ نزلت ع الشارع … بعرف شباب من تبعات المسيرات … وشباب من تبعات المظاهرات (على اعتبار أنو حارتنا ضيقة ومنعرف بعض) … بس الكل عم يلعب ويعفرت … صح مو مع بعض … بس الكل متفق أنو لازم نلعب … ركضت بالشوارع متل المجانين … عبيت الدنيي صريخ وضحك مع أنو صارت الساعة 2 بعد نص الليل … واللي شايف أنو من حقو يحاسبني يتفضل … ع القليلة بعد كم ساعة أنا نازل متل كل يوم ع مراكز الإيواء قدّم اللي بقدر عليه من مساعدة

تصبحو ع قلوب بيضا متل التلج

14 كانون الثاني 2013

أضف تعليق »

علماني و طائفي

18 كانون الأول 2012

انو سايرونا دقيقتين واسمعونا…وفكرو فيها كمان دقيقتين…وبعدين منرجع منكمل جولة المساببة والتخوين والصريخ..ماشي؟

أضف تعليق »

نطاف

السياسيون كالنطاف …. كل كذا مليون ليجي منن بني آدم واحد ….

على ذمة عدنان 🙂

أضف تعليق »

و الله ما حلوة!

بما إنو صار عنا سرقة و خطف و ذبح و سحل و اغتيال و تكفير و طائفية و سلاح و تعصب و نفاق و تسلق…
معناتا تعو نتفق على إنو هاد الشي اللي عم بصير بسوريا ما ممكن يسمى ثورة, الثورة أعم و أشمل أكتر مما ذكر بكتير…
ممكن يسمى ببساطة: “ناس بدهن يبدلوا نظام بنظام بالتعاون مع أيّا ناس…” عالأقل..

و بما إنو صار عنا قصف و طيران و فراغية و عنقودية و مدن مدمّرة و ناس مشرّدة و أعتقال و تعسف و استحمار بجميع أشكاله…
معناتا تعو نتّفق على إنو هاد الشي اللي عم يحكم سوريا هلق ما ممكن يسمى نظام حكم سياسي فعلي و فعّال….
ممكن يسمى “ناس بدهن يحاربوا الناس اللي بدهن يبدلو النظام بنظام تاني…وبس”

لك يا خيو, مَالتسميات مشوّهة, و المصطلحات تحرّفت, و البديهيات صار بدها صفنة, و المسلّمات مختلفين عليها..

تعوا نتفق عالبديهيات و المسلّمات بالأول, و نبلّش نقتل ببعض مشان شي حقيقي, أخي و الله مو مشلكة, معلش…

خلي هالناس تموت مشان هدف و مبدأ و فكرة يكون الواحد مستعد يموت بسبيلها…لأنو و الله بكرا بهدلة قدّام الملائكة و الشياطين و السكان و العالم يجي واحد يسأل تنين سوريين: و أنتوا ليش متتوا؟
يقوم الأول يجاوب مشان النظام, و التاني يجاوب: مشان يسقط النظام!

و الله ما حلوة!

أضف تعليق »